Nýr 9 manna rafbíll frá Mercedes-Benz með 421 km drægi

Nýr 9 manna rafbíll frá Mercedes-Benz með 421 km drægi

13. mars 2020

Nýr og breyttur Mercedes-Benz eVito Tourer var frumsýndur í þessari viku og var að vonum mikil spenna fyrir frumsýningunni á þessum vinsæla atvinnubíl sem verður nú fáanlegur sem rafbíll.

Hinn nýi og rafmagnaði eVito Tourer er hreinn rafbíll og með engan úblástur. Hann er með allt að 421 km drægni á rafmagninu. Rafhlaðan skilar 150 kW eða 204 hestöflum og togið er alls 362 Nm. Hægt er að hlaða bílinn allt að 80% á innan við 45 mínútum.  eVito Tourer er með pláss fyrir níu farþega, auk bílstjóra. Bíllinn býður upp á mikil þægindi fyrir farþega sem einnig njóta góðs af tæknivæddu umhverfi innanrýmisins.

Bíllinn hefur breyst talsvert í útliti bæði að innan og utan. Framhluti bílsins er með nýrri hönnun og innanrýmið er nokkuð breytt, m.a með nýju sætisáklæði.  Nýi bíllinn er mjög tæknivæddur en hann er m.a. í boði með stafrænni myndavél í stað aftur spegils sem sýnir allt sem er fyrir aftan bílinn. Aksturseiginleikarnir hafa verið bættir enn frekar m.a. með nýjustu tækni af AIRMATIC loftpúðafjöðrun. Aksturs- og öryggisbúnaður bílsins er  eins og best verður á kosið m.a. með DISTRONIC búnaðinum sem er hraðatengdur fjarlægðarskynjari. Þá er bíllinn búinn nýjasta Active Brake Assist búnaði. Nýr Vito atvinnubíll er einnig í boði með fjögurra sílindra dísilvél.  Lúxusgerð bílsins er einnig væntanleg í suma í EQV útfærslu sem er byggð á hinum gríðarvinsæla V-Class sem er mjög vinsæll hér á landi.

Vito hefur verið mjög vinsæll atvinnubíll og þriðja kynslóð bílsins hefur selst í rúmlega 508 þúsund eintökum á heimsvísu síðan hún kom á markað haustið 2014. Bíllinn er framleiddur í verksmiðju Mercedes-Benz í Vitoria á Spáni.

 

Þessi síða notar fótspor (e. cookies) vegna nauðsynlegrar virkni hennar og til að safna tölfræðigögnum með þeim tilgangi að gera síðuna betri.