Vision EQS hugmyndabíllinn frumsýndur

Vision EQS hugmyndabíllinn frumsýndur

17. september 2019

Mercedes-Benz frumsýndi hugmyndabílinn Vision EQS á bílasýningunni í Frankfurt sem nú stendur yfir. Bíllinn fékk að vonum mikla athygli á sýningunni enda sýnir hann framtíðina fyrir stóran, 100% rafknúinn lúxusbíl.

Vision EQS sýnir öflug áform Mercedes-Benz í rafbílavæðingunni. Vision EQS er með drægni upp á allt að 700 km samkvæmt WLTP stöðlum. Hann hefur 350 kW afl og togið er alls 760 Nm. Bíllinn fer úr kyrrstöðu í hundraiið á innan við 4,5 sekúndum. Hægt er að hlaða bílinn allt að 80% hleðslu á innan við 20 mínútum.

Bíllinn er hannaður af EQ deild Mercedes-Benz. Vision EQS er framúrstefnulegur í hönnun en um leið glæsilegur lúxusbíll. Bíllinn er búinn allri nýjustu tækni frá Mercedes-Benz og þar er m.a. að finna nýjustu útgáfuna af MBUX margmiðlunarkerfinu. Bíllinn er búinn nýjasta Level 3 kerfi í sjálfkeyrandi akstri og að sögn Mercedes-Benz verður bíllinn að fullu sjálfkeyrandi í nánustu framtíð. Þá er bíllinn með nýjustu tækni af Digital framljósum sem verða með sérlega öflugt 360° ljósabelti. Innanrýmið er hannað í anda lúxussnekkja og mun bjóða upp á mestu þægindi og lúxus sem völ er á í bíl. Mælaborðið og stjórntakkar er sérlega nýstárlegt og sýnir hvað framtíðin mun bera í skauti sér. Hugmyndabíllinn Vision EQS markar tímamót að því leyti að þetta er fyrsti stóri lúxusbíllinn sem kemur fram á sjónarsviðið sem er hreinn rafbíll.

Búist er við að EQS komi í framleiðslu eftir 2-3 ár. Gera má ráð fyrir því að EQS verði sjáanlegur á Íslandi snemma eftir að framleiðsla hefst þar sem Bílaumboðið Askja er eitt af umboðum Mercedes-Benz sem er fyrst til að fá EQ bíla til afhendingar. Mercedes-Benz hyggst vera komið með yfir 10 rafbíla á markað árið 2022 og yfir 30 bíla þegar tekið er tillit til tengiltvinnbíla (EQ Power). Til viðbótar mun Mercedes-Benz síðan koma með 100% rafdrifna bíla úr smiðju AMG. Það er mjög mikið um að vera í EQ línu Mercedes-Benz. EQC hefur fengið mjög góðar viðtökur hér á landi og EQV rafbíllinn er væntanlegur á næsta ári en síðan koma EQA og EQB innan 12 mánaða. EQA er byggður á GLA, og EQB er 7 manna bíll byggður á GLB. Það má því með sanni segja að framtíðin sé rafmögnuð hjá Mercedes-Benz.

 

Þessi síða notar fótspor (e. cookies) vegna nauðsynlegrar virkni hennar og til að safna tölfræðigögnum með þeim tilgangi að gera síðuna betri.